جرائم الشرف! ليه مايعاقب فاعلها ؟؟؟

السلام عليكم ورحمه الله وبركاته

موضوعي يندرج تحت المواضيع الجريئه ( في نظر المجتمع ) لأنه يتطرق لشئ متعارف عليه عند الأغلبية والبعض

أخذها من المسلمات التي لاتناقش

وهي جرائم الشرف

أكثر شي ينشر عن جرائم الشرف في الأردن ( طبعا أتكلم عن الصحف ) وفي الأخير لين كشفوا على البنت طلعت عذراء ؟؟ ممكن أهلها يشكون فيها لانه لها علاقة بشاب أو يمكن أخوها أو أبوها اللي ذبحها ( مريض بالشك )

ومجتمعنا مو أحسن منهم بمعنى أنه جرائم الشرف عندنا ولكن من تحت لتحت ما يعلن عنها !! البنت تنسحب لبر أو لأي مكان وتنذبح أو تدفن وهي حية !! والمشكلة المجتمع مايعتبر اللي يصير جريمة والقاتل ما يحاسب ولا يعاقب !!

من متى صرنا القاضي والجلاد ؟؟ هل الذبح اللي يصير يرضي الله ؟؟ هل القران والسنة قالت اذا البنت كلمت أو حتى فقدت عذريتها فمعناها تذبح ؟؟ ليه ما فيه قانون يمنع هالتصرفات الهمجية !! ؟؟؟

أنا مو هنا أبرر للبنت وأقول عادي تكلم أو تتعرف أو تزني ! فأنا ضده ومافيه إنسان (عاقل ) يقول هالتصرفات صحيحة ولكن هل جزاءها لو أخطأت القتل بدم بارد ؟؟ والمصيبة الأعظم إنه حتى الدولة ماتعاقب ( المجرمين )

الإسلام حدد عقوبة الزاني والزانية ( الله يبعدنا عن الزنا ) وهي الرجم إن كانوا محصنين (يعني متزوجين ) والجلد والتغريب للي مو محصنين ( يعني العزابية )

ليه الناس مايلتزمون بتعاليم الاسلام …ليه المشايخ مايحكون عن هالجانب ويوعون الناس إن اللي يسوونه غلط ؟؟ طيب بقتلهم البنت مايندرج تحت ( قتل النفس بغير حق ) ؟؟

ليه احنا دايما نمرر هالافكار لعيالنا بدال مانوعيهم انه هالشي غلط ومو من الدين ؟؟

واللي يخلي الواحد يستغرب من جد انه الولد ليه مايذبحونه مثل البنت ؟؟ عشان البنت فيه دليل على عذريتها والولد لا ؟؟ والمشكله حتى لو الأهل يعرفون ولدهم يزني مستحيل ومن سابع المستحيلات يقدمونه عشان ياخذ جزاءه الشرعي !! والبنت ( بلا جزاء شرعي بلا هم ) نذبحها ونغسل شرفنا !!

الله عزوجل يوم خلقنا خلانا سواسية في الثواب والعقاب… ويجي مجتمعنا العقيم ويميز بين البنت والولد حتى في العقوبة !! ؟؟

طيب لو ذبحت بنتك ايش استفدت؟؟ كيف غسلت شرفت ؟؟ لو بنتك تعاقبها بأي حاجة ( إلا القتل ) أو تقدمها تاخذ جزاءها الشرعي كان أفضل !! وحتى لو قتلتها الناس ممكن يذكرون البنت ايش سوت وحتى لو ماعرفوا ايش سوت بيحطون مليون علامة استفهام على قتلها او موتها ؟؟ !!

أصلحوا عيالكم واحتووهم ولا تخلونهم يطيحون في مستنقع الرذيلة !! مو تروحون تحتقرون البنت وتسفهون فيها ولا تعطون لوجودها أي وزن وفي الأخير لو بتغلط لو غلط صغير توطيتوا في بطنها وذبحتوها !!

و يامجتمعي ( يامن تفاخرتم بإسلامكم ) انفضوا عنكم غبار ( التقاليد البالية ) التي تناقض ديننا الإسلامي الذي رسم لنا الخطوط العريضه في هذه الحياة حتى لاتبؤوا بغضب من الله !!

ودي يوم يطلع شيخ يقول لنا الحكم في قتل الغير محصنة من أهلها ؟؟ وهل توجب في القاتل عقوبة القصاص ؟؟

الحين ايش رايكم في الموضوع ؟؟ هل تحسون ان الوضع عادي وانه مفروض نواكب التيار ولانعتبر الأمر جريمة … والا يبي لنا وقفة مع أنفسنا و مع الأفكار اللي يزرعونها فينا المجتمع من هالجانب ؟؟

عيب حرام مايجوز !! تكفون فكونا وخلونا نعيش ولاتضيقون علينا

السلام عليكم ورحمه الله وبركاته

كيف حالكم كل ابوكم ؟؟ زمااان ماسيرت هنا…انشغلت بدراستي الله لايشغلنا الا بطاعته بس جد وحشتووووني قدا قدا …

واشكر ميوش ياحبي لها اللي سألت عني …ياجعلنا ماننحرم منك

المهم ماابي ابربر واجد ويقولون خير الكلام ماقل ودل << زارفة (سارقه ) المثل من كتابة قراءه خخخ

راح انزل موضوع سبق ونزلته في منتديات رجه…كنت كاتبته وكانت النفس خلاص طابت من اللي معقدين الدين ويفتون على كل طالعه ونازله وكمان عن الناس اللي ينطون لك على كل كلمة تقولينها 

 

نبدا على بركة الله

 

 
السلام عليكم ورحمه الله وبركاته

 

تخيل نفسك قاعد في أمان الله تسولف وفجأه قلت كلمة بنظرك عاديه وتحصل أحد ينط لك ويمسكها عليك ويقعد يتفلسف 

 

مثلا مره كانوا يحكون لي عن شاب نعرف أهله وخويه صار لهم حادث الشاب تكسر ودخل في غيبوبه وخويه مات على طول الله

يرحمه …كنت خاشه في السالفه ومتعاطفه مع الآدمي ويوم خلصت السالفه ختمتها بكلمة ياحياتي<<تعاطفا مع الشاب

قال لي شخص: أنا عارف انه ماتقصدين بكلمة (ياحياتي ) كغزل أو حاجه بس لاعاد تستخدمينها لأنه عندنا عقليات بيفهمونها غلط لو بتقولينها قدامهم

قلت له : انا مقتنعه بالكلمه وماطلعت معاي الا تعاطفا أما الناس فما علي منهم ومحد سلم منهم فليه أحسب لهم حساب !!

الشاهد من القصه انه فيه ناس يمسكون عليك كل كلمة ويقعدون يحللونها

يايقولون عيب

يايقولون حرام

وغيرها من الأسباب

لين سألت ليه عيب ؟؟ قالوا المجتمع !! طيب أنا وش علي من المجتمع ؟؟ أوكي أنا عايشه معاهم وبينهم بس مو

معناها إني أسوي شي أو أغير طريقة كلامي عشان يرضون علي المجتمع !! اذا كان ( بعض ) افراد المجتمع

عقليتهم محدوده ( مع احترامي للجميع ) فمو معقوله أتغير عشانهم

المجتمع مو يجون يحكمون على نيتي  

مثلا كلمة (ياحياتي )

بعض المجتمع يمكن يقول ( ماتستحي على وجهها تقول هالكلام,,, ياخزيااه,,,ماتربت)

اما الفئه الواعيه بيعرفون أنه ( كلمة مثل غيرها من الكلمات تعبر عن التعاطف وانه كل شخص له طريقته )

 

ونجي لسالفة الحرام (دينيا )

مثلا قاعد ونفس الشي تسولف وقالوا لك عن شخص صار له حادث ( وش فيني على الحوادث  ) والا صارت له

أي مصيبه ( الله يبعد عننا المصايب ) وانت قلت ( ياحراااااام ) << نفس الشي تعاطفا 

فجأه يجيك شخص وينط لك حرام ومايجوز….الخ

طيب ليه حرام ومايجوز؟؟

بيجي يقول المشايخ قالوا وماادري ايش وانه اعتراض على القدر وممكن يعطيك الفتوى كمان

يؤ اعتراض على القدر مره وحده 

طيب أنا يوم اقول ( ياحرام ) ايش كانت نيتي ؟؟ تعاطف ؟؟ والا اني جايه بالفعل اعترض واجي اقول ليه ياربي سويت للادمي كذا ؟؟

ليه مانشوف نية الشخص مانشوف الكلمة؟؟

طيب قبل لاتجون تقولون لي مايجوز وحرام ليه ماتحكمون على النيه …نسيتوا حديث الرسول عليه الصلاة والسلام (

إنما الأعمال بالنيات )

يمكن يجي أحد يقول لي طيب ابعدي عن هالكلام أسلم لك حتى ماتقعين في المحظور شرعيا

بيكون ردي ,,, دام إن نيتي صافيه عند ربي فهذا اللي يهم وفي الأخير احنا بشر ومحد محاسبنا إلا رب العالمين

وعلى طاري الحرام ومايجوز والفتاوي

مره شفت حاجه ماأدري اضحك عليها وإلا أبكي والا وش اسوي

كنت أفر في النت أدور على فتوى تبيها جدتي الله يحفظها ودخلت على موقع فتاوي ناسيه ايش هو بالضبط … المهم

اني لقيت فتاوي حدها عجيبه !! مع احترامي بس إني اقراها وأنقد على اللي سألها 

من الفتاوي ,,, احد يسأل عن ( ماحكم إطفاء الأنوار وقت الزفه ) خخخخخخخخ بالله هذا وش نقول عليه 

عن جد فيه ناس مايمشون إلا بفتاوي ويسألون عن اشياء ماأدري وش تبي

معليش بس الله عطانا العقل عشان نفكر ,,,أما الفتاوي عن الأمور التافهه بمجرد مانفكر فيها راح نكون عارفين

 الإجابة لها بس ليه انه لازم نسأل شيخ وعالم ؟؟ فيه أمور أهم إنه نسال عنها ونحتاج فيها فتاوي !! ياخوفي بكره

يجي واحد من المتزمتين ويسأل ( ماحكم الاستحمام بالشامبو  )

حلو الواحد يلتزم بالدين ويحاول يتجنب الوقوع بالحرام بس مو معناها تضيقون على المسلمين وتضيقون على أنفسكم

عن جد تحس انه فيه ناس بس ودهم كل شي يصير حرام وتناسوا إنه ديننا دين يسر !! ليه يعسرون على المسلمين ؟؟

ولا ننسى ( لاتسألوا عن شي إن يبدو لكم يسؤكم)

نجــــــحت <<كانه حلم لاتصحوني

نجــــــــــــــــــــــــــــــــــــــــــــــــــحت

 

Cant believe it

 

Am I dreaming ??

 

وااااااااااااااااااااااااو

الحمد والشكر لك ياااارب

 

ان شاء الله يرتفع معدلي

 

شكرا لكل من دعى لي,,,الله يوفقكم ويسعدكم 

 

 

 

وتم الانتقال رسميا للمستوى السابع

 

عاد وناسه هالمستوى بس 6 مواد 15 ساعه

 

Thanks 4 all of ya

 

 

ان لله وان اليه راجعون

مشعل الماضي

 

سلمان العباد

 

حسام الشنيفي

 

عبدالرحمن الثنيان

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
اللـهـم انزله منازل الصديقين والشهداء والصالحين وحسن اولئك رفيقا .
اللـهـم اجعل قبره روضة من رياض الجنة ,ولا تجعله حفرة من حفر النار .
اللـهـم افسح له في قبره مد بصره وافرش قبره من فراش الجنة .
اللـهـم اعذه من عذاب القبر ,وجاف ِالارض عن جنبيها .
اللـهـم املأ قبره بالرضا والنور والفسحة والسرور.
اللـهـم إنه فى ذمتك وحبل جوارك فقه فتنة الفبر وعذاب النار , وانت أهل الوفاء والحق فاغفر له وارحمه انك انت الغفور الرحيم.
اللـهـم انه عبدك وابن عبدك خرج من الدنيا وسعته ومحبوبيه وأحبائه إلي ظلمة القبر وماهو لاقته .
اللـهـم انه كان يشهد أنك لا إله الا انت وأن محمداً عبدك ورسولك وانت اعلم به.
اللهم ثبته عند السؤال
اللهم انا نتوسل بك اليك ونقسم بك عليك ان ترحمه ولا تعذبه
اللـهـم انه نَزَل بك وأنت خير منزول به واصبح فقير الي رحمتك وأنت غني عن عذابه .
اللـهـم اّته برحمتك ورضاك وقه فتنه القبر وعذابه و أّته برحمتك الامن من عذابك حتي تبعثه إلي جنتك يا أرحم الراحمين .
اللـهـم انقله من مواطن الدود وضيق اللحود إلي جنات الخلود .
اللـهـم إحمه تحت الارض واستره يوم العرض ولا تخزه يوم يبعثون “يوم لا ينفع مال ولا بنون إالا من أتي الله بقلب سليم”
اللـهـم يمن كتابه ويسر حسابه وثقل بالحسنات ميزانه وثبت علي الصراط اقدامه واسكنه في اعلي الجنات بجوار حبيبك ومصطفاك (صلي الله عليه وسلم) .
اللـهـم اّمنه من فزع يوم القيامة ومن هول يوم القيامة وأجعل نفسه أّمنة مطمئنة ولقنه حجته .
اللـهـم اجعله في بطن القبر مطمئن وعند قيام الاشهاد أمن وبجود رضوانك واثق وإلي أعلي درجاتك سابق .
اللـهـم اجعل عن يمينه نوراً حتي تبعثه اّمنً مطمئن في نور من نورك .
اللـهـم انظر اليه نظرة رضا فإن من تنظر إليه نظرة رضا لا تعذبه ابداً
اللـهـم أسكنه فسيح الجنان واغفر له يارحمن وارحم يارحيم وتجاوز عما تعلم ياعليم .
اللـهـم اعفو عنه فإنك القائل “ويعفو عن كثير”
اللـهـم انه جاء ببابك وأناخ بجنابك فَجْد عليه بعفوك وإكرامك وجود إحسانك .
اللـهـم إن رحمتك وسعت كل شيء فارحمه رحمة تطمئن بها نفسه وتقر به عينه .
اللـهـم احشره مع المتقين إلي الرحمن وفداً .
اللـهـم احشره مع اصحاب اليمين واجعل تحيته سلام لك من أصحاب اليمين .
اللـهـم بشره بقولك “كلوا واشربوا هنئياً بما أسلفتم في الايام الخالية” .
اللـهـم اجعله من الذين سعدوا في الجنة خالدين فيها مادامت السموات والارض .
اللـهـم لا نزكيه عليك ولكنا نحسبه انه اّمن وعمل صالحاً فاجعل له جنتين ذواتي أفنان بحق قولك:
“ولمن خاف مقام ربه جنتان”
اللـهـم شفع فيه نبينا ومصطفاك واحشره تحت لوائه واسقه من يده الشريفة شربة هنيئة لا يظمأ بعدها ابداُُ .
اللـهـم اجعله في جنة الخلد التي وعد المتقون كانت جزاءً ومصيراُ لهم ما يشاءون وكان علي ربك وعداُ ومسئولاً .
اللـهـم إنه صبر علي البلاء فلم يجزع فامنحه درجة الصابرين الذين يوفون اجورهم بغير حساب
فإنك القائل ” إنما يوفي الصابرون أجرهم بغير حساب “
اللـهـم انه كان مصلي لك ,فثبنه علي الصراط يوم تزل الاقدام .
اللـهـم انه كان صائم لك , فأدخله الجنة من باب الريان.
اللـهـم انه كان لكتابك تالي وسامع فشفع فيه القراّن وارحمه من النيران ,واجعله يارحمن
يرتقي في الجنة إلي اّخر اّية قرأها أو سمعها وأخر حرف تلاه
اللـهـم ارزقه بكل حرف في القراّن حلاوة , وبكل كلمة كرامة وبكل اّية سعادة وبكل سورة سلامة وبكل جْزءٍ جَزاءً .
اللـهـم ارحمه فانه كان مسلم واغفر له فانه كان مؤمنً.
وادخله الجنه فانه كان بنبيك مصدقً وسامحه فانه كان لكتابك مرتل.
اللـهـم اغفر لحينا وميتنا وشاهدنا وغائبنا وصغيرنا وكبيرنا وذَكّرنَا وأنثانا .
اللـهـم من أحييته منا فأحيه علي الاسلام ومن توفيته منا فتوفه علي الايمان .
اللـهـم لا تحرمنا أجره ولا تضللنا بعده .
اللـهـم ارحمنا اذا اتانا اليقين ,وعرق منا الجبين ,كشر الانين والحنين
اللـهـم ارحمنا اذا يئس منا الطبيب ,وبكي علينا الحبيب وتخلي عنا القريب والغريب
وارتفع النشيج والنحيب .
اللـهـم ارحمنا اذا اشتدت الكربات وتوالت الحسرات واطبقت الروعات وفاضت العبرات ,
وتكشفت العورات وتعطلت القوي والقدرات .
اللـهـم ارحمنا اذا بلغت التراقي وقيل من راق وتأكدت فجيعة الفراق للأهل والفراق
وقد حَمً القضاء فليس من واق
اللـهـم ارحمنا اذا حملنا علي الاعناق ألي ربك يومئذ المساق وداعا ابديا للدور الاسواق والاقلام
والاوراق الي من تذل له الجباه والاعناق .
اللـهـم ارحمنا اذا ورينا التراب وغلقت القبور والابواب وانقض الاهل والاحباب فإذا الوحشة والوحدة وهول الحساب .
اللـهـم ارحمنا اذا فارقنا النعيم وانقطع النسيم وقيل ماغرك بربك الكريم
اللـهـم ارحمنا اذا أقمنا للسؤال وخاننا المقال ولم ينفع جاه ولامال ولا عيال وقد حال الحال وليس الا فضل الكبير المتعال .
اللـهـم ارحمنا اذا نَسي اسمنا ودَرس رسمنا وأحاط بنا قسمنا ووسعنا .
اللـهـم ارحما اذا اَهملنا فلم يزرنا زائر ولم يذكرنا ذاكر ومالنا من قوة ولا ناصر فلا امل الا في القاهر القادر الغافر يامن اذا وعد وفي , واذا توعد عفا , وشفع يارب فينا حبيبنا المصطفي واجعلنا ممن صفا ووفا وبالله إكتفي يا ارحم الراحمين ياحي يا قيوم يا بديع السموات والارض ياذا الجلال والاكرام .
اللـهـم انه عبدك و ابن عبدك و ابن امتك مات و هو يشهد لك بالوحدانية و لرسولك بالشهادة فأغفر له إنك انت الغفار.
اللـهـم لا تحرمنا اجره ولا تفتنا بعده و اغفر لنا و له و اجمعنا معه في جنات النعيم يا رب العالمين .
اللـهـم انزل علي اهله الصبر والسلوان و ارضهم بقضائك.
اللـهـم ثبتهم علي القول الثابت في الحياه الدنيا وفي الاخره ويوم يقوم الاشهاد.
اللـهـم صلي وسلم وبارك علي سيدنا محمد وعلي اّله وصحبه وسلم إلي يوم الدين

 

 

عبدالله الخريف

 

الله يشفيك يارب ويرجعك لأهلك سالم غانم

 

دعواتكم لهم

 

 

 

والله الغرب والكفار ماجابوا خبرنا

السلام عليكم ورحمه الله وبركاته

 

 

 

 

مايخفى علينا انه بعض الاحيان يصادفونا ناس تفكيرهم (ماادري وش يبي)

 

المشكله اذا كانوا اصحاب هالتفكير كبار وكمان متعلمين

 

مثلا :

 

مره طالبة في جامعة الملك سعود (في السنه التحضيريه) منزله موضوع وش كبره عشان تقول بما معنى كلامها

 

انه حصلت في المصلى قذارة قطوه (وانتوا بكرامه) وفي اكثر من مكان

 

طيب لهنا البنت ماقالت شي بالعكس الله يجزاها خير تنبه على انه فيه قذاره في المصلى اللي مفروض يكون نظيف

 

بس اعقبت كلامها ( اكيد انهم استاذاتنا او عاملات الكافرات هم اللي حطوا القاذورات في المصلى عشان يهينوا مصلانا)

 

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ

 

 

معليش فاصل ضحك بس معليه كل ماتذكرت كلامها ماادري ليه تمسك معي ضحكه وانهيها بكلمة ( الله يعطينا العقل )

 

بس بجد فيه ناس عندهم وسوسة ( الغرب والكفار )

 

أي شي يصير ( هذي محاولة من الغرب والكفار لتغريب الأمه )

 

يعني عندكم مثال الاخت اللي ذكرت قصتها

 

يعني بالله استاذه جامعيه جايه تدرسك وبتروح تشيل قذاره وتحطها في المصلى؟؟ اكبر همها احنا ؟؟عساها بس تعطي المحاضرات وتضف عفشها وتنحاش دامها تدرس مثل هالعقليات

 

والا تجيك هالعامله الضعيفه اللي كل يوم تضفضف بعدك فاضيه بتروح تحط القذاره؟؟ طيب مو هي في النهايه اللي بتشيلها ؟؟ وش حادها على العناء؟؟

 

وبعدين المصلى نادرا مانحصله فاضي,,يعني ناس طالعين وناس داخلين,,, بالله هاللي بتحط القذاره بتقول لهم غمضوا عيونكم مثلا ؟؟

 

يعني هالبنت ليه ماقالت انه القطوه هي اللي سوت كذا (واحنا عارفين انه القطاوه وخصوصا اللي مو متربيه ( حلوه متربيه هع) مايعرفون مكان معين لعمل هالحاجات يعني مصلى او كلاس ماتفرق معاهم !!؟؟

 

مثل ماقلت فيه ناس تعدت عندهم مرحلة الوسوسه وصار مثل المرض

 

يعني لو تجي بعوضه وتقرصها قالت هذولا الكفار مرسلينها عشان تأذي المسلمين

 

ياناااااس والله الغرب ماجابوا خبرنا ,,, الناس تطوروا واحنا لحد الان نردد الكفار سووا الكفار حطوا الكفار قالوا,,, واكيد هذي مؤامره منهم,,,,,الخ

 

خلوهم يصطفلوا مع دينهم دامهم ما أذونا ,,,,

 

وبعدين الاجانب لو شافوا مننا المعامله الحسنه فهذا الشي راح يحببهم في الاسلام  ويمكن يعتنقونه

 

اما اسلوب الهمج والتنفير بالعكس راح يخليهم يكرهوا الاسلام والمسلمين

 

الدين النصيحه

 

وخلونا نخلي قدوتنا الرسول عليه الصلاة والسلام اللي كان أحلم الناس,,, ويكفينا انه نذكر قصته مع جاره اليهودي اللي كان يأذيه ويرمي عليه القاذورات

 

والرسول وش سوا؟؟

 

ذبحه؟؟

 

قطع رقبته؟؟

 

فجره؟؟

 

لا ماسوا ولاشي من هالكلام

 

بالعكس يوم جاره اليهودي مرض راح الرسول عليه الصلاة والسلام زاره,,,ماقال هذا ضرني

 

والنتيجه

 

اسلم هاليهودي !!!

 

طيب ليه؟؟ ايش خلاه يسلم؟؟

 

الاسلوب,,, الحلم ,,, الصبر,,,,اخلاق الرسول

 

هذا اللي نحتاجه,,,نبي نقتدي بالرسول,,,نبي الناس يحبوا الاسلام مو ينفروا منه

 

نبي العقليات الهمجيه تتغير (واعذروني على هالتسميه) نبي نسوي لهم غسيل للمخ عشان نطرد منها هالتفكير الفاشل !!!

 

الاجنبي انسان مثلنا مثله !! الحين لو شفنا اجانب ضربوا مسلم والا اذوه قومنا الدنيا ولاقعدناها

 

ولكن احنا

 

عادي نضيق عليهم عيشتهم ونعاملهم مثل الحثاله,,, وفيهم خير يتكلمون

 

ليه؟؟؟

 

احنا مسلمين

 

الحمدلله اللي فضلنا بهالشي,,, ولكن هذا مو عذر يخلينا نعامل الغير كأنهم حثاله

 

ولكن اسمحوا لي انه بعضنا مااتبع او نقول مامثل الاسلام حق التمثيل

 

اما انه يجي ياخذ من الدين اللي يبي ويخلي اللي يبي هنا نقول stop

 

اللي نبيه انه نفهم الدين صح,,,نمثله صح,,,

 

اما انك تجي تكشر في وجه مسيحي او غير مسلم كأنك شوي وتتوطى في بطنه وتقول انا مسلم هالشي أنا ارفضه <<ماادري عنكم عشان كذا  بأحكي عن نفسي 

 

نبي مسلمين باسلام

 

مانبي اسلام مجهولي الهوية ؟؟

 

والله انه نشوف بعض الاجانب يتحلون بأخلاق احنا مفروض نتحلى فيها لانه الاسلام حثنا عليها

 

ترى ماطلع لنا هالارهابيين اللي يذبحون في المسلمين والكفار (المعاهدين ) الا بسبب هالافكار

 

ممكن نستصغر هالمشكله ولكن مع كذا يبي لها حل,,, لانها متى مااستفحلت في المجتمع راح تطلع لنا مصايب

 

لانه البعض مايكون بالاصل عنده هالافكاراللي ماادري وش تبي ولكن تنتقل له ممن يحملون مثل هالافكار (فينضم لقافلتهم)

 

والله يهدي الجميع

واخيررا ياعطله مابغيتي تجين

مرحبااا جميعا

 

 

 

 

 

واخيرا,,, واخيرا عطلت

 

عطلت عطلت عط عط عطلت << يقالك تلحنها هع

 

احس انه خلااااص حيلي مهدود

 

من عطلت وانا بس اقحن (اشرب) مويه ,,,,24 ساعه عطشانه تقولون كأني طاقتها رجليه من الرياض للشرقيه << تشبيه ماادري وش يبي

 

بس تهقون فيه رابط مشترك بين حالة العطش وبين انتهاء الاختبارات

 

المشكلة جاتني دعوه ارض جو

 

وحده قالت لي جعلك ماتتهنين بالاجازه لين نعطل احنا <<ترى مهيب اختي هع

 

طلعت من الامتحان امس الصباح طبعا,,, والظهر جاني تعب مو طبيعي الام في الحلق والرقبه <<قايلته دعاويها صاروخيه

 

اجل ذاك اليوم دعت قالت ياليت كمبيوترك يخرب ,,, من بكره خرب

 

ياااحول وهي ودعاويها

 

تشوفوني احاول استمتع بالعطله عشان تنقهر بس ماااش ماقدرت خايفه من درجة المادة اللي سبق وقلت لكم عليها

 

 

 

يلا اهم شي عطلنا وعقبااال كل اللي ماعطلوا وان شاء الله نفرح كلنا بالمعدلات الكويسه

 

طول ايام الاختبارات كنت افكر بمواضيع اكتبها بس كلها نسيتها الحين,, كأن احد رامي على راسي بلكه افقدتني الذاكره

 

ان شاء الله لي عوده قريبه مع بعض المواضيع  التي اتمنى ان تجوز على رضاكم هع

 

يلا لو سمحتوا كل واحد يجيب هدية بمناسبة اني خلصت معركة الامتحانات اللي مهيب لذيذه

ليه الظلم ياناااااس :@

السلام عليكم ورحمه الله وبركاته

 

 

 

 

 

من زمان عن هالمكان بس هانت معاد باقي الا اسبوع واخلص ( الله يعدي الاسبوع الجاي على خير )

 

ماتتصورون كيف مقفله معاي,,,يعني زود ماعندي امتحانات جت وحده من الدكتورات وكملتها

 

الظلم يانااس متى ينتهي الظلم L

 

سالفتي تبدا يوم جت استاذه ( الترجمة الاداريه ) وقالت لنا امتحان الشهر الاول عليه 20 والشهر الثاني كمان عليه 20 وعلى واجب نسلمه 10 درجات ,,,, يعني المجموع كله 50

 

لهنا واحنا حلوين

 

الشهر الاول جبت 16 ونص من 20

الشهر الثاني جبت 15 من 20

 

درجات معقوله الحمدلله

 

نجي الحين للواجب ,,,, طبعا اختكم في الله متعوده تسلم واجباتها على ايميلات الدكتورات وكلهم يقبلونه ,,, يوم جاء واجب هالاستاذه سلمته كعادتي عن طريق الايميل ولانه كمان ذاك الوقت طابعتي خربانه

 

كنت كاتبه في الايميل بما معنى  الكلام (teacher  if you get this email, plz let me know ) يعني استاذه اذا وصلك الايميل عطيني خبر (كنت مرسله الايميل يوم الاربعاء وهو اخر يوم تسليم فيه الواجب)

 

انتظرت الويك اند ولاوصلني منها أي رد,,, يوم الجمعه ارسلت لصاحبتي الايميل وقلت اطبعي الواجب وبأخذه منك في الجامعه ,,,

 

وصرت طول الاسبوع اجي لمكتب حضرتها بس طال عمرها غايبه ,,, كلمت الاستاذه اللي معاها في نفس المكتب وقلت لها ترسل لها مسج على جوالها وبالفعل ماقصرت ارسلت لها مسج وقالت لها (انه طالبة اسمها غاده مرسله على ايميلك الواجب من الاربعاء اللي فات ) وكمان ماردت على الاستاذه

 

بعدها بأسبوع وتحديدا يوم الجمعه قالت لي وحده من صحباتي انه الاستاذه بتكون موجوده السبت ( السبت هو يوم اوفي ) قلت في نفسي مو مشكلة بأحضر السبت أهم شي اكلمها

 

بالفعل رحت وحصلتها في مكتبها ودخلت عليها والابتسامه شاقه وجهي

 

أنا : استاذه ارسلت لك الواجب على الايميل بس مارديتي علي وجبت معاي كوبي احتياط

هي : لا ماراح اقبله

أنا: بس استاذه انا مرسلته على الايميل وفي الوقت المحدد

هي: مااقبل عن طريق الايميل

أنا : بس استاذه في الكلاس سمعت وحده من البنات تقول لك انها ارسلت على ايميلك وقلتي انه اول ماارجع من الجامعه باشيك عليه فقلت اكيد انها تقبل عن طريق الايميل,,, وبعدين انا طول الاسبوع اللي فات اجي لمكتبك واحصلك غايبه يعني وشلون بأسلم الواجب وكمان قلت لوحده من الاستاذات ترسل لك مسج على جوالك

هي : انتي غاده ؟؟ ايه وصلني مسج عنك<<انا هنا تفائلت

أنا : ايه انا غاده

هي : ومع كذا ماراح اقبل منك شي

أنا : ليه يااستاذه بس انا مشتغله ومرسلته على ايميلك وعندك الايميل موثق فيه يوم الارسال

هي: كمبيوتري فيه فايروس ولااشيك على الايميل

أنا : طيب فيه نت في الجامعه تقدرين تشيكين على الايميل منه (الكمبيوتر في مكتبها بس وش نقول في ناس ماعندهم لاذمه ولاضمير )

هي : تراك ازعجتيني اطلعي برى << بالله هذا اسلوب استاذه جامعيه ؟؟

أنا: بس ,,,

هي: اقول لك اطلعي برى

أنا : طيب بأطلع بس خلي معاك الكوبي

هي : ماراح اخذه ولااقبله

أنا : معليش على الاقل خذيه

هي: اييييييه ترى منيب فاضيه لك ,,, عطيني اللي في يدك

سحبت الاوراق بكل وقاحه وبعدين اشرت على مجموعه ملفات

هي: شفتي هالملفات؟

أنا : ايه ؟

هي : هالملفات للبنات اللي ماراح اعطيهم الدرجه وانتي منهم

 

هنا حسيت اني اتكلم مع جدار وطلعت والدنيا مقفله في وجهي ,,, تنرفزت من اسلوبها الوسخ وضاق صدري اني جيت يوم اوفي عشان شي مايسوى :@

 

كنت مأمله انها تغير رايها  وتعطيني الدرجه بس نزلت الدرجات وصارت معطيتني صفر حسبي الله عليها ونعم الوكيل

 

بنات قالوا لي روحي للوكيلة وكلميها,,,, ابوي يقول لي جيبي رقمها من القسم وانا اكلمها ( لانه ابوي الله يحفظه دكتور في الجامعه وبيقدر يتفاهم معاها ) ,,, وبنات يقولون لي لاتروحين للوكيلة ولاتخلين ابوك يكلمها لانه هالاستاذه معروفه بقذارتها وانها تحط في الراس يعني ممكن لو تحطني في راسها بترسبني ( وانتوا عارفين النظام في جامعاتنا الحبيبه مافيه احد يحاسب الاساتذه )

 

ماادري محتاره ,,, ؟؟

تكفون انا وصل مرحلة اليأس ,,,طلبتكم في كل صلاة تدعون لي ان اعدي ,,,,تكفون ادعوا لي الله يسعدكم ويوفقكم

(^_^)

السلام عليكم ورحمه الله وبركاته

 

وقسم ان لكم وحشتوني وحشه مهيب صاااحيه ,,, على قولة بزارينا لين جوا يعبرون ( اشتقت لكم قد السماء ونجماته وقد البر ورملاته ) <<اهم شي البر <<عنصريه للرياض الواقعه في وسط الكثبان الرمليه والطعوس خخخ)

 

اييييه على ايام اول لين جينا نعبر ,,,سبحان الله كلنا نفس الجمله …وعاد جملنا الشهيره ( اكتب لك بالاحمر علامة الحب الاكبر,,,, اكتب لك بالرصاص علامة الحب والاخلاص ,,,,اكتب لك بالمقلوب علامة الحب في القلوب ) ,,, يعني لو تشوفون وحده من عصر كابتن ماجد وغرندايزر وفتحتوا دفتر ذكرياتها كان تشوفون كل صديقاتها كاتبين نفس الجمل بس الاختلاف في الاسم وفي عدد القلوب المرسومه خخخخخ

 

عارفه اني مقصره في المدونه وكمان في زيارة المدونات الثانيه ومرره اشتقت اني اقرا اللي تكتبونه وكمان اشتقت لتعليقاتكم هنا …. بس وش اسوي الدراسه اشغلتني وخصوصا هالفتره انواع الازمات,,,,امتحاانات ,,, تراجم ,,,بروجكتات ,,تسجيل….يعني باختصار ماني لاقيه وقت اني احك راسي اللي مافيه الا شعرتين خخخخ 

 

 

لكن بأحاول كل ماشفت نفسي فاضيه اني ادخل او اكتب حاجه ,…واذا انعدم تواجدي فاعرفوا اني في معركه مع الامتحانات ياذابح يامذبوح خخخخ

 

انا بأعرف من الدافور اللي قايل الامتحانات معركه لذيذه<<والله ماقد شافت اللذاذه خخخخ

 

 

المهم دعواتكم ان الله يوفقني في امتحاناتي واني اعدي كل المواد ولا ادحدر في أي مادة او اشنقلها معي للترم الجاي<<<<ياااارب توفيقك (وجه فيه الصيحه)

انصكت بعين

السلام عليكم ورحمه الله وبركاته

 

 

 

 

قال الله تعالى ومن شر حاسد اذا حسد)

 

 

الحسد حق…واي واحد مسلم أكيد راح يؤمن بالحسد

 

 

فيه ناس اعوذ بالله مهما كانوا شبعانين وعندهم خير بس تحصلون عينهم تطالع اللي عند غيرهم

 

يعني الواحد ليه مايكون قنوع؟؟ عشان نعرف نعمة الله علينا مفروض نشوف اللي أقل مننا مو اللي أعلى

 

 

ولكن الحين الناس صاروا موسوسين بالعين…وبصراحه ماني عارفه هل أضحك عليهم والا اتفهمهم ؟؟

 

 

مرات أقول والله يحق لهم من كثر مانسمع ونشوف لناس تضرروا من العين

 

ومرات أقول موسوسين بزياده….وبالفعل فيه ناس عندهم كابوس اسمه (عين)

 

 

لين كح بزر لهم قالوا عين….مع انه ولدهم كان شارب مويه بارده

 

يجيك ولدهم يطامر مع الدرج وتكرفع وطاح قالوا اكيييد انها فلانه ذاك اليوم عطته عين..مع انه فلانه ماشافتهم لها سنه

 

 

لو السالفه على عين كان انا اكثر وحده انصكت بعين…ياما تكرفعت وياما تكسرت وياما صارت لي اصابات شنيعه بس ماعمري فكرت انها عين لانه هالشي مقدر ومكتوب .

 

 

يجونك بعض الحريم بعد كل عزيمه تجمع الغسال حق البيالات وتتمسح به حتى لو ماكان فيها شي….بس الوسوسه الله يكافينا الشر

 

 

والا بعض الامهات يجيك ولدها ماشاف الزين أبد وتلقينها ماتطلعه على الناس تخاف انه يصكونه بعين…

 

فيه ناس مايسوون اشياء ودهم يسوونها والسبب ….نخاف ننصك بالعين

 

 

خلاص انا احس هالشي فكره نتربى عليها ,,, يعني اذا كانوا اللي حوالينك موسوسين بالعين فأكيد راح تتاثر لو بشي بسيط بهالفكره

 

بزارين الحين الواحد طول اصبعي ومع كذا هم كمان موسوسين بالعين….طيب ليه كذا؟؟

 

 

اوكي العين حق بس عاد مو بتفريط

 

ومفروض نتذكر ان الحافظ الله ولو الله كاتب انك بتنصكين بعين فراح تنصكين بها وحتى لو كنتي في غرفه مقفله محد يشوفك…

 

نقرا وردنا (اذكار الصباح والمساء) ونتوكل على الله

عيدكم مبارك

السلام عليكم ورحمه الله وبركاته

 

كاني اشوفكم الحين اللي تمسمس كشتها بالاستشوار

 

واللي تجهز الملابس واكسسواراتها

 

واللي تدور شوزها اللي توها شاريته وصاروا عيال اخوها حاطينه حدود المرمى هع

 

واللي بيروح الحين للحلاق يحلق

 

واللي توه يصحى ويستوعب انه ماشرى ثوب للعيد

 

 

مااقول الا الله يعينا ويعينكم

 

 

بس حبيت ابارك لكم بالعيد وكل عام وانت بخير

 

 

والله يعوده عليكم اعواما عديده وانتم بصحة وسلامه يارب

 

 

 

 

 

 

مستنكره

السلام عليكم ورحمه الله وبركاته

 

ياهلا والله ومرحبا باللي يقرأون…كيف حالكم؟؟

 

العشر عليكم مباركه

 

ماادري احس اني مستنكره المكان خبركم أول مره اسوي مدونه واحس اني ضايعه ماأدبر شي <<مشكله العليميات خخخ

 

فعشان كذا مازالت الحرب أقصد أعمال التصليح والصيانه قائمه ولسى ماافتتحت المدونه افتتاح رسمي << بجيب زوليه حمراء وشريطه ومقص من عند الخياط لازم اسوي فيها اني مفتتحه شي مهم<<مناك بس هع

 

إن شاء الله قريبا راح أخلص من الصيانه والاصلاحات وبعدها راح أعلن إنطلاق مدونة (سواليف القايلة رسميا)

 

تقبلوا سلامي وتقديري

يالله ان تحييهم

السلام عليكم ورحمه الله وبركاته

 

اليوم وبتاريخ 26-9-2008 تم افتتاح مدونة سواليف القايله << اللي بيسمعها يقول فاتحه شركه هع

طبعا بما اني تنكه (الاعتراف بالحق فضيله) فيه كم شخص وشخصه ساعدوني

في البدايه أشكر توتا على الهيدر اللي سوته والي تشوفونه فوق <<يعني هيدر بيصير تحت يالتنكه هع

والمشكله اني مااستحي وطلبت منها هيدر ثاني <<ان كان صاحبك عسل لاتلحسه كله

عن جد مشكوووووووووووووره (قلوب من هنا لمكه)

اما الثانيه اللي راح اشكرها فهي خوخه (سمفونيات أنثى) اللي ساعدتني في الأمور اللي ماعرفتها وشرحت لي بعض الشغلات حتى انها دخلت على الداش بورد وقامت تحوس فيها بما اني خبصت أبو الدعوه

مرره مشكوووره يادوبا والله يعطيك العافيه

اما الثالث فهو ولد خالتي (عبدالله) مع انه ماساعدني ذيك المساعده كلها عناويين ولاتخلو مساعدته من التريقه علي خخخخ

شكررررا قزيلن جدا<<تسمع بالشكر

وفي النهايه هالمدونه طلعت بعد جهد جهيد حتى انه جت أوقات (بما اني ماعندي صبر) وبغيت الغي فكرة المدونه واكتفي بالمنتديات بس بالمساعدات اللي جتني قدرت أطلع بشي اسمه مدونه  نوعا ما خخخخ

فالله يحييكم ويشرفني تكونوا من رواد هالصفحه المتواضعه

وكل عيد وانتوا بصحه وسلامه قبل الزحمه :d

تحية معطره لكم جميعا

كل واحد يتبكبك لي فيذا!! صدق منتب وجيه نعمه

 

راح تكون أول تدوينه هنا لموضوع سبق وطرحته في حدا هالمنتديات (منتدى رجه) قلت يابنت ورى ماتنسخينه ومير اللي ادعس واجيبه لكم ….اخليكم مع الموضوع

 

---

 

السلام عليكم ورحمه الله وبركاته

انا يابنهبل يابنهبل يابنهبل وياإن تسبدي بتنبط بطت(ن) مهيب صاحيه !!

بتقولون وش فيها ذي؟؟

تبون تعرفون؟؟

طيب أنا أقول لكم

قبل كل شي أبيكم تحسبون في راسكم الهموم التي تقض مضجعكم<<متعوب عليها

حسبتوها؟؟أكيييييييد؟؟ حطوا عيونكم في عيوني!! ترى ماراح اوهقكم واقول لكم تذكرونها!!يعني هالشي راح يكون بينكم وبين نفسكم

طيب بسألكم؟؟كم عمركم؟؟ ؟؟ 15 -18-20-30؟؟

اعتقد اغلب اللي هنا لسى في ريعان شبابهم <<اكشخ ياريعان خخخ

بس اللي اشوفه فيكم واللي يحزني عليكم انكم معيشين نفسكم في هم وحزن وضيقة خلق حتى انكم تنقلون ضيقة الصدر للي حواليكم

ويااخي خل اللي حوالينك بعد ينبسطون !!يعني الواحد لو بيقعد مع واحد دايما مهموم فلابد ان الممل وضيقة الصدر تتسلل لنفسه حتى لو جاملك ومابين!!

يعني بكيتوا ..قفلتوا على نفسكم الغرفه والا يجيني واحد مسوي فيها رومنسي ويقول بروح اذب همومي في البحر

يعني اللي ماعنده بحر زي العاصمه الحبيبه!! وين يذب همومه!! عند هالطعوس والنفوذ؟؟

المهم ماعلينا ندور لنا مكان نذب فيه هـع

الحين بعد هذا كله ايش استفدتوا؟؟ راحت ساعات من حياتكم لايمكن انها ترجع في هم وضيقه

يااخي بعض هالناس ياانهم يبطون التسبد !! حتى لو مالقى له هم عشان يضيق صدره فيه تلقاه يدور ومايهدى باله الا لين يحصل له هم!! بتقولون من هو ذا الخبل اللي يسوي كذا

انا اقول لكم<<ياكثر ماتقولين

يجيك واحد يضحك ويتمزع بطنه من الضحك ولين خلص من الضحك قال الله يستر وش يجي بعد هالضحكه

ولين سألته وش مناسبه هالهذره اللي مالها سنع

قال عمر الفرح مادام لي<< دام انه مايدوم لك ورى مااتتهنى بهاللحظه اللي تضحك فيها ولين جاك هم قم تبكبك وصايح ومحد رادك

فكوني عليه <<وش فيها عصبت خخخخخخخخ

بس جد لو تكلمنا بالمنطق وحسبناها صح فترى اغلب همومنا أتفه من انه نضيق صدرنا عليها

أكيد الكل سمع بالمثل اللي يقول من شاف مصيبة غيره تهون عليه مصيبته

من فينا وقف وتأمل هالمثل وقارن همومه بهموم غيره؟؟

والله ياجماعه اني أعرف ناس انه هموهم أتفه من التافهه ومع كذا هم أكثر الناس يشتكون !! طيب ليه؟؟ هذا السؤال اللي عجزت ألقى له جواب

بدل مانبكي ونعيش في هم و و و و المفروض نقعد مع انفسنا (ياصبر ذا النفس من كثر ماتقعدين معها هـع) المهم نحاول نلقى حل لمشاكلنا

لهمومنا

اعرفوا ايش السبب؟؟ وحاولوا تكتشفون الحل!! وصدقوني مافيه شي صعب

ياناااس الدنيا قصيره وتراها اقصر من انها تروح على دموع وحرقة قلب

عن جد شي يحز في الخاطر انك تشوف واحد باقي صغير ولابعد اكتشف الدنيا وتلقى كل كلامه يشكي والا كل اشعاره هموم وحزن ولوعه وفراق

ماادري هل تنبسطون بهالحاله؟؟ اقصد انكم تغرقون انفسكم بالحزن؟؟ يانااس تراكم مابعد شفتوا الهموم على اصولها ذيك الساعه الظاهر ماراح يردكم الا الفيصليه طابين منها محيفره

انا مااقول لكم لاتحزنوا!! اكيد كل واحد لابد تجيه لحظات حزن وضعف !! لكن عاد لاتبتلون فيها وتطولون على هالحاله

ودايما حاولوا تشوفون الجانب المشرق من الدنيا وحاولوا ان الجانب المظلم مايغلبك

واذا حسيتوا ان خلاص معاد تقدرون تتحملون الهموم وانكم طحتوا ولااحد سمى عليكم فمالكم الا تتوجهون الى رب العباد

قوموا تالي هالليل وصلوا لكم ركعتين وادعوا رب العالمين ان الله يفرجها لك

وجعلي مااشوف الحزن ولاضيقة الصدر تعرف لكم طريق

اعذروني على الكلام الغير مترابط بس طلع من قلب محروق على حال هالجيل اللي كل ماله من جرف لدحديره<<ليه انتي من اي جيل خخخخخ

ترى سافرت للقطب الشمالي

 

السلام عليكم ورحمه الله وبركاته 

 

 

 

عبارات نسمعها بين الفتره والثانيه

 

 

 

 

سافرت لباريس
عندنا بيت في اسبانيا
انا مااقضي ملابس العيد من هنا لازم اروح برى في رحلة شوبينق

 

والا يجيك ولد

انا بروح لمباراة برشلونه احضرها وبرجع من بكره
شريت سياره لمبورقيني وماارتحت فيها والحين موقفه في كراج البيت
هالصيف بروح جوله في اوروبا

وغيرها من العبارات ……….

نجي للعباره الأولى (سافرت لباريس) ولو سألتها باريس عاصمة ايش قالت عاصمة المانيا!!

عندنا بيت في أسبانيا …. وهي حدها بيتهم اللي ساكنين فيه ويالله بنوه كمان

انا مااقضي ملابس العيد من هنا لازم اروح برى في رحلة شوبينق….وهي حتى الفيصليه ماشموا ريحتها<<مانعهم اخوهم يقول الفيصليه مهيب زينه خخخخ

انا بروح لمباراة برشلونه احضرها وبرجع من بكره… وهو مباراه في استاذ الملك فهد ماقدر يحضرها <<ماعنده حق البنزين اللي يوصله هنا خخخخ

شريت سياره لمبورقيني وماارتحت فيها والحين موقفه في كراج البيت<< وهو حده لين كشخ شرى له كامري وبالتقسيط كمان

 

هالصيف بروح جولة في اوروبا<< قصده جوله في ربوع بلادي بس خانه التعبير

 

 

 

 

 

 

 

يعني بأفهم ليه الكذب من هالناس؟؟ يعني هم يبون يسوون انفسهم (شي) والا وش السالفه؟؟

بس الغالب ( هو عقدة النقص)على بالهم انه بيكبرون بعيون الناس ( مع انه في ناس يقدرون فئه الكاش) ومادروا انه أهم ما للإنسان اخلاقه

 

فيه ناس (رغم انهم من الطبقه الوسطى او الاقل من الوسطى) مايتعرفون الا على ناس (هاي كلاس) عشان يقولون صديقتها تعيد في ماربيا وتصيف في جنيف والمشكله انها ماترضى تصادق اللي من نفس طبقتها<<عجيب والله

 

الناس للأسف ذبحتهم المظاهر ومحاولة إنهم يكونوا شي فوق اللي يقدروا عليه وماعرفوا ان التواضع هو اساس كل شي مو الشكل والامور الجانبيه

 

يعني فيه ناس ممكن انها ماتصاحب بنت حبوبه وعسوله واخلاق بمجرد انها ( مو ستايل) بعباره أخرى قرويه!!

 

 

ماادري متى هالناس اللي من هالنوع يفهمون انه الدنيا مو بس مظاهر وانه العلاقات الانسانيه ارقى من هالأمور السطحيه

 

 

 

 

 

 

 

ياما بنت على قد حالها أحسن بألف مره من بنت كاش

ياما بنت قرويه أحسن بألف مره من بنت ستايل

 

 

 

 

 

بس هذولا وش بيفهمهم دام انه فكرة ( اللوك والاستايل والكاش مسيطره عليهم)مايعرفوا ان السفرات والاشياء السطحيه ماتهم اذا كانت الواحد اخلاقه مو ذاك الزود؟؟؟

 

 

 

 

 

الأخلاق
حب مصلحة الطرف الآخر
التواضع
التواجد اذا كان بحاجه لك
أن تدله على الطريق الصحيح إذا أضاع طريقه
الفرح لفرحه
البكاء لأجله

هو أساس العلاقات بين الناس

 

أما

اللوك
السفرات
كم في رصيدك
ايش نوع سيارتك
ايش ماركة شنطتك

أمور سطحيه لاتقدم ولاتأخر في العلاقات الانسانيه

 

واحب اختمها بعبارتين

 

من طالع فوق انكسرت رقبته
,
,
,

ومن تواضع لله رفعه

حملة 10 مليون مدخن ” أشعل أملا بإطفائها

---

حملة 10 مليون مدخن ” أشعل أملا بإطفائها “

لايتطلب الأمر كثيرا حينما تكون لدينا الإرداة والعزم والتصميم لكي نقلع عن التدخين ونطفئ آخر سيجارة لنشعل أملا بصحة وحياة طيبة لأنفسنا ولمن حولنا.
فهي الإرادة أولا وآخرا لكي لاتتحكم بنا تلك المكونات المسرطنة المسببة للإدمان والتي تسبب عشرات الأنواع من السرطانات بالإضافة إلى التأثيرات النفسية والإجتماعية الصحية والبيئة وغيرها.

لنتحرر منها الآن باستغلال شهر رمضان الذي يوضح لنا أننا قادرون على التوقف لساعات طويلة سرعان مانعتاد على عدم التدخين خلاله , وهو فرصة عظيمة جدا لكي نزيد عدد ساعات التوقف بل لنتوقف نهائيا

هناك عيادات متخصصة تساعد على الإقلاع وهي مكملة لعنصر الإرادة الأهم في هذا الأمر , كما توجد أدورات مساعدة تخفف من حدة آثار التوقف عن التدخين والتي غالبا تكون لعدة أيام فقط لحين تقبل الجسم لنقص النيكوتين في الجسم

لكي تقلع :

1- يجب أن تكون لديك الإرداة والعزم أولا
2- أن تطلع على آثار التدخين التي بلا شك ستزيد من قناعاتك وقوة إرداتك
3- أن تتحمل أول الأيام بدون سجائر – وهي أعراض تزول بسرعة- أو أن تستعيض عنها بأدوات مساعدة كاللواصق والعلكة وغيرها أو زيارة عيادات التدخين
4- أن تعزز الإيجابيات لديك والتي تتبين لك بمجرد أن تتوقف ومنها :

أ) ستجد أن صعوبة التنفس إختفت, بل ستجد أن مقدار الهواء النظيف يزداد في رئتيك
ب) ستبدأ بتذوق انواع الأطعمة بمذاقات لم تعهدها قبل أن تقلع وستسعد بذلك
ج) ستجد أن لياقتك البدنية قد إرتفعت وأصبحت أكثر أقل تعبا حين تقوم بأي مجهود
د) ستجد أنك متحرر من الإختباء والذهاب لأمكان خاصة للتدخين
ه) عائلتك ستدعمك وستفرح بقراراك وستجد بيتك ومكان عملك نظيفا وصحيا
ز) وغيرها الكثير التي ستكتشفها بمجرد إقلاعك ولعل أهمها زوال خطر الإصابة بأمراض قاتله

5- أن تكثر من زيارة المواقع المتخصصة بالتدخين التابعة للجمعيات وغيرها وستجد مايفاجئك من حقائق ونوصي بزيارة هذا الرابط
http://www.antismoke.org/

عن الحملة :

حملة 10 مليون مدخن ” أشعل أملا بإطفائها “
تهدف الحملة لإيصال رسالتها لأكثر من 10 مليون مستخدم عربي خلال فترة الحملة للاستفادة من شهر رمضان لمساعدة المدخنين للإقلاع عن التدخين والتوعية المجتمعات العربية والشباب بصفة خاصة بمضار التدخين وأخطاره .

تبدأ الحملة في بداية شهر رمضان المبارك برعاية الجمعية الخيرية لمكافحة التدخين في الرياض وتنظيم وتنفيذ عالم التطوع العربي ومشاركة أكثر من 250 موقع إلكتروني عربي بما فيها هذا الموقع الموقر , وذلك لنشرها والتوعية بمخاطر التدخين وطرق الإقلاع عنها وإستغلال شهر رمضان المبارك لإطفاء آخر سجارة .

تعتبر الحملة أكبر حملة عربية تستهدف التوعية بأضرار التدخين في العالم العربي , يشرف ويشارك في الحملة عشرات المتطوعين النبلاء الذين إتخذوا من مكافحة التدخين رسالة لهم وهدف ليسهموا في خدمة مجتمعاتهم , لنشاركهم ولندعمهم جميعا, لكي تصل الرسالة إلى كل مدخن ..

موقع الحملة :

http://www.arabvolunteering.org/antismoke/

شاركوا معنا في نشر هذه الحملة التي تهمنا جميعا لكي ننعم في مجتمعات صحية خاليه من التدخين

إخوكم
مشرف الحملة
الشيخ / عادل الخوفي

غـــاده ( فلان) ماااااااات

---

 

غــاده (فلان ) ماااااااااااااااات

هالجمله ترن في اذني بكل وضوح

حلم مرعب ,,,يبكي ,,,كأنه حقيقي

 

قمت من النوم مفزوعه ,,عرقي يتصبب ,,عيني مليانه دموع ,,وقلبي يدق بقوه من الخوف وشوي يطلع من مكانه!!

 

تلفت يمين يسار كأني أدور شي مضيعته !! يمكن لاني لسى بين الواقع وبين الحلم مابعد صحصحت زين !!

 

كل اللي اشوفه حولي ظلام في ظلام …وبعدها استوعبت إني لسى في غرفتي وعلى سريري

 

مسكت الجوال اشوف الساعه كم…. 12 ونص بالليل !!

 

تعوذت بالله من الشيطان ,,, من الحلم اللي هزني

 

كنت احلم إني فقدت أحد أقاربي وقالوا لي إنه توفى بحادث وكان قبلها قاعد معانا عادي مافيه إلا العافيه

أذكر كنت أبكي بصوت عالي ( رغم إنني ماقد بكيت هالبكاء في الحقيقه)

 

كنت اصرخ على نفسي إنه كذب وإنه قريبي ماتوفى !! مجرد اشاعه

 

ولكن الحمدلله إنه كل هذا طلع مجرد حلم,,,,كابوس

 

ولكن هالحلم خلاني افكر في اللي حواليني

 

أمي

أبوي

اخواني

اخواتي

قرايبي

صديقاتي

زميلاتي

 

ايش قدمت لهم؟؟

 

يعني لو لاقدر الله طلع الحلم حقيقه وتوفى أحد الاشخاص

 

هل كان راضي عني؟؟ أو شايل علي؟؟

 

هل في يوم غلطت في حقه ؟؟ والا في يوم كنت سبب سعادته وضحكته؟؟

 

اللي اعرفه إنه لسى اللي اعرفهم عايشين فيه فرصه اقعد معاهم اسولف ,,اسمع همومهم وأخفف عنهم

 

اللي اعرفه إنه لسى فيه وقت اعتذر من الاشخاص اللي سبق وأخطيت في حقهم واطلب انهم يسامحوني

 

لاني اليوم هم معي وأنا معاهم بس بكره يمكن أحد فينا يكون تحت التراب

 

يمكن اسمع عباره ( فلان أو فلانه ماتوا ويطلبون الحل)

 

فلابد إنه استغل كل فرصه عشان أبين لهم قد ايش هم يعنون لي ,,وقد ايش احبهم واقدرهم

فمن اليوم وطالع خلونا نبين للكل اننا نحبهم

 

لانحقد

لاننتقم

لانجرح

 

حتى بعدين مانندم على اي لحظه

 

 

ياما سمعنا وسمعنا قصص عن اثنين كانوا متهاوشين وشايلين على بعض ومات واحد فيهم والثاني عاش بعذاب الضمير يبي يرجّع

 

دقيقه

والا حتى ثانيه

عشان يعتذر للشخص اللي مات ,,,يترجاه ,,يبكي عشان يسامحه !!

 

فمفروض مانخلي أنفسنا في هالمواقف واحنا نقدر نتجنبها الحين

 

الكلام هذا موجه لي قبل أن يوجه لكم

فأعتذر من كل شخص ضايقته أو زعلته بيوم واتمنى منكم السماح

فانا اليوم معكم ولكن بكره ماادري وين أكون

سامحوني وحللوني

 

 

مسااافره

نسدد الفاتوره بعد كم يوم ونرجع لكم هع

خارج نطاق التغطيه لدواعي السفر

 

استودعكم الله جميعا

في أمان الكريم

 

 

 

 

 

يعرف شخصيتي من توقيعي؟؟ ياولد وش السالفه؟

السلام عليكم ورحمه الله وبركاته

 

كيفكم كل ابوكم وامكم ؟؟ ان شاء الله تزقحون ( كويسين لغير الناطقين بلغة هضبة نجد ) هع

مره من المراير كانت خالتي تحكي لنا عن خوي زوجها وانه يعرف يحلل شخصيه الواحد من توقيعه وانه حلل شخصيه خالتي وطلعت اشياء كثيره صحيحه

وانا اللي انشب لخالتي واقول لها بعطيك توقيعي وخلي زوجك يوصله لخويه ويحلل شخصيتي<< وش يحلل بالله معروفه تنكه ومفهيه مع شوي لحسة مخ خخخخ

المهم ويخش خالي معانا في الخط بدون مايدق اشاره<<مصله على الطاير هع

قال : احس هالاشياء خرابيط..ايش يعرف شخصيه الواحد من شخابيط

قلنا له : انه هذا علم ويندرس

قال: بس توقيع مايوضح شخصيه الواحد يعني لو واحد قدامك وقام يسوي حركات بيده ممكن من خلال هالشي  تعرفين اذا الواحد متوتر او مرتبك او مستحي…الخ ولكن التوقيع يمكن الشخص مو قدامك فعلى اي اساس يتحلل شخصيته؟؟

وقال كمان اللي يحللون شخصيتك يمكن يقولوا صفات عامه مهيب  فيك وانت تقنع نفسك بالعكس…اضرب لكم مثال جاء واحد قال انت حساس وانت الحساسيه مهيب يمك ولاتعرف طريقك فتبرمج مخك انه ( ايه هالشي صحيح) بالرغم انه مو صحيح

يعني الواحد يقتنع باشياء تكون مهيب فيه

طبعا الكلام اللي فوق اصغته باسلوبي ولكن نقلت لكم الفكره العامه اللي تفحط في مخ المدعو خالي

 

وبيني وبينكم احس اني انلحست معاه شوي وصدقت كلامه<< انتي كل شي يلحسك

شكل خالي بينجلد من اللي يدرسون علم النفس هع

سؤالي للاشخاص اللي يدرسون علم نفس… على اي اساس تحكمون على شخصيه الواحد من توقيعه ( قلت من توقيعه مو يجيني احد مسوي فاهم ويقول من تعابير وجهه) هع

وسؤالي للبقيه اللي يسمعون بعلم النفس ولايدرون وش هو : هل تؤمنون بأنه فيه اشخاص ممكن يعرفون شخصيتك من توقيعك؟؟

والله يعين اللي بيحلل توقيعي اللي كأنه توقيع بزر توه ماسك قلم << مفروض ابصم ويخب على خشتي خخخ

المطاوعه وأسلوبهم لين جوا ينصحون!!!

السلام عليكم ورحمه الله وبركاته 

 

قمة العذاب إن الواحد يكتب بوست جديد وحرف الالف في الكيبورد معلق ماادري وش سالفته هع

الالتزام الديني او اللي نسميه باللغه العاميه ( الطوع) حاجه طيبه,, والله يثبت كل من جاهد نفسه ضد الشهوات وملهيات الدنيا ويهدينا لطاعته

لكن فيه فئتين للملتزمين :

فئه قمة الأدب والأخلاق ولين جوا ينصحونك تستحي منهم بسبب طريقتهم الرائعه في النصح

الفئه الثانيه,,, صحيح انهم ملتزمين بس لين جوا ينصحون ودك انهم يسكتون

 

 

مافيه اي اسلوب,,, النصح قريب من الصراخ ,,,ويمكن يعطونك نظره استحقاار !!

المشكله انه هالنوعيه مايدرون انهم ممكن ينفرون الناس من الالتزام بسبب اسلوبهم الخطأ!! ولكن هم بزعمهم إنه حنا ملتزمين احنا الصح !!

قال تعالى : ( إنك لاتهدي من أحببت ولكن الله يهدي من يشاء )

 

الهدايه بيد الله عزوجل ولو كان الواحد افسق خلق الله ,,, ولكن بعض الملتزمين اذا ماشافوك مثلهم بعد النصح يحسبونك مااخذ الدعوه ( تحدي أو عناد) !!

اللي نحتاجه تثقيف بعض الملتزمين وانهم يعرفون اساليب النصح والكلام,,, يتبعون طريقة رسولنا محمد عليه الصلاة والسلام فهو اعظم قائد وافضل ناصح !!

 

ياما عاصي تاب بفضل الله ثم بفضل أحد الملتزمين من الفئه الأولى

وياما عاصي زاد باللي هو فيه لانه واحد نصحه بطريقه خطأ وبأسلوب ماادري وش اوصفه به!!

 

 

 

الملتزمين وضعهم حساس فهم بنظر الاغلبيه يمثلون الدين ,,, فإذا صاروا مو حليمين او اسلوبهم في النصح مو ذاك الزود فإنهم يعكسون صوره سلبيه عن الدين الاسلامي دين التسامح والمحبه والسلام !!

 

 

 

اذكر مره كنت طالعه أنا وخالتي واخواتي وزوجة خالي للسوق ,, وكنا داخلين وحده من هالمحلات وكان المحل مافيه إلا

احنا!! فجأه سمعنا صوت رجال من برى المحل يصارخ

الرجال: هييه إنتي

التفتنا كلنا لمصدر الصوت وكانوا اثنين من رجال الهيئه ,,, واحد كان ساكت والثاني كان اسلوبه بالنصح غلط!

عاد انا ماادري وش سالفتي بس من اشوف واحد من الهيئه أنتفض رغم إني متنقبه ومااحط اي زينه في المول حتى لو كحل! عشان كذا اول ماشفت رجل الهيئه التفت وعطيته ظهري كأني أدور تيشرت ولو تسألوني وش اني ماسكه هذاك الوقت بأقولكم ماادري!!!

الرجال: هيييه إنتي تغطي !
تغطي؟؟ كلنا متغطين مافيه إلا هيوف اختي اللي في الابتدائي ماتغطت!! معقوله يقصد هيفاء؟؟ بس هي لسى صغيره !!

الرجال: ماتسمعين إنتي أقول لك غطي عيونك

يوم قال غطي عيونك عرفنا إنه يقصد وحده فينا,,,, وفي النهايه صارت زوجة خالي المقصوده!! مع العلم إن عبايتها على الراس!!وانا وخالتي واخواتي رغم انه عباياتنا على الكتف بس ماتكلم علينا !!
المهم إنه رجل الهيئه طول ماهو يصارخ على زوجة خالي وهو عينه في عينها مع انه الاسلام حثنا على غض البصر!!

زوجة خالي على طول غطت عيونها وقالت له : الله يجزاك خير مره ثانيه لين جيت تنصح انصح بشويش مو بصراخ ومنافخ!! وبعد نزل عيونك مو تقعد تطالع فيني
تعرفون وش قال لها:هذي النظره شرعيه << ليه الاخ جاي يخطب!! اي شرعيه ياعم!!

مفروض لو رجال جاء بينصح وقز له بنت يبي ينصحها على طول ينزل عيونه على الارض وينصح بأسلوب هادئ بدون مايطالعها!! مو كأنه شوي ويحرقها بنظراته!!

 

 

 

يعني الهيئه جهاز مهم في الدوله ووجودهم ضروري برأيي,,, ولكن هم يمثلون الاسلام ولكن بعض اللي ينتسبون لهالجهاز يمثلون الاسلام بطريقه خاطئه وهالشي ينعكس بشكل سلبي !!

وياما قصص مع نااس ملتزمين نسمع فيها,, مثلوا الدين بطريقه سيئه
وبالمقابل ياما سمعنا عن ناس ملتزمين بأسلوبهم الحلو قدروا يقنعون الطرف الآخر وهذا هو اللي نحتاجه

يعني الزبده من كلامي: اللي بيمثل الدين يكون عارف وعالم فيه و يكون النصح بالرفق واللين حتى تؤثر النصيحه في نفس الموجهه له !!

الله يرزقنا الهدايه

وأخيرا تحقق الحلم اللي له 3 سنين يتغلى!!

السلام عليكم ورحمه الله وبركاته

طالب جامعي وليت الحظ جا معي<<ينطبق علي هالمثل هـع

كل من عرف غاده في الجامعه,,,عرف إنها تحلم ب day off مثل اي طالب جامعي

لكن هالحلم ماتحقق طول ال 3 سنين اللي درستها في الجامعه<<حظي اقشر اقول يمين يقول يسار اقوله ورى يقول سيده هـع

الترم اللي فات كانوا يجرجوني يوم الثلاثاء عشان محاضره وحده من 12 الى 2 , واذا حسبتها صح فالغالب مااخذ من وقت المحاضره الا ساعه وربع او ساعه ونص بالكثير وكنت عاضه على شحم ومنطمه

جاء هالترم ونزلت الجداول,,,,,,ونفس الشي تكرر وصار عندي السبت محاضره وحده بس قلت مابدهاش مطلعه لي اوف مطلعته

واللي ساعدني انه اول ترم يطبقون الحذف والاضافه عن طريق النت,,, كان مسموح لي ابدا بالحذف والتعديل يوم الاحد

السبت نمت بدري بعد صلاة المغرب<<عجوز حبتين هع

وكنت مشغله المسن ويوم صحيت الساعه 1 ونص حصلت البنات كاتبين لي بما انه عارفين ازمتي مع الاوف

غاده قومي
يمكن يفتح الحذف والاضافه وانتي نايمه
عالعموم أول ماتقومين شيكي على طول

بس لاتنسين تصحين تلحقين عالحذف والاضافه بعد ساعة بيفتحونه
غااااااااده قومي قومي عدلي جدولك

وانا اللي مير انقز من نومي ويوم شفت الا الاتصال منفصل,,,,حاولت اشبك بس مافيه اتصال!! نقزت للمودم واثاري بابا فاصله عشان ينامون اخواني حقين المدارس ,,,,ركبت المودم وبغيت اكتب ورقه لحد يفصله هـع

وانقز لموقع البوابة الالكترونيه اللي عن طريقها احذف واعدل ,,, حاولت اغير شعبة مادة يوم السبت بس مو راضي <<انا هنا ماادري وش اسوي اضحك والا اكمل نومتي<<تبلد احساس هـع

وطرى على بالي اطلب نجدة وحده من البنات .,,, قلت هي املي الاخير ضبط معاي حلو ماضبط عادي كل سنه ماتغير شي ماراح اتأثر هـع هـع

والله يعافيها قدرت تضبطه لي لانه internet explorer عندي زلابه

وأخيرررررررررررا حسيت اني طالبه جامعيه ولأول مره اجرب طعم الاوف,,, ولأول مره احب يوم السبت

الدوام… والسيستم اللي انقلب فوق تحت

---

 

ياشين الدوام بعد الراحه والتبطح والتسدح والفضوه والنوم على المزاج

غالبا اول ماتبدا الدوامات كل شي ينقلب فوق تحت

موعد النوم…الاكل …. باختصار كل شي

في البدايه الاغلبيه يتخبطون عشوائيا لين بقدرة قادر يتعدل السيستم حقهم (نوعا ما)

بس تو قعدت افكر مين فينا وازن أموره وعمل جدول يمشي عليه؟؟ بحيث نخلي لكل شي وقته

النوم له وقت… عمل الواجبات والبحوث له وقت…اللعب له وقت …. وغيره…بحيث نلتزم بالمواعيد

يعني مثلا نكتب في الجدول

ارجع من الجامعه الساعه 1
انام من الساعه 1 الى الساعه 4
4-5 اتغدى واشرب شاهي عند التلفزيون
5 – 7 عمل الواجبات والبحوث المطلوبه
7- 8 اتعشى
9 -10 اتحمم
10 -11 اقعد على النت
11- 6 انام

هذا موذج كتبته عشوائي كفكره عامه عن اللي ممكن الواحد يسويه…. طبعا كل واحد يحط اولوياته لانه جدولي أكيد بيختلف عن جدول غيري

لانه الاغلبيه يايضيع وقتهم في النوم او على النت بحيث يركزون على جانب وينسون الباقي

طبعا لو احنا ماتعودنا انه نمشي على جدول اكيد بنحصل صعوبة في البدايه…بس الواحد مايطلع من بطن امه متعود يعني لكل شي بدايه… نضغط على انفسنا ونحاول نتلزم بالجدول وفي النهايه بيصير كل شي في حياتنا بنظام

اعتقد النظام احسن من العشوائيه والا؟؟ لانه لو عشنا عشوائي يمكن يضيع اليوم بدون مانستفيد منه ولا شي

وعشان نقدر نساعد انفسنا …لابد ورقة الجدول تكون معانا في الشنطه..البوك.. اي مكان المهم انه تكون معانا وين مارحنا

وكمان اقترح انه نحط تذكير بالجوال بالمواعيد بحيث اذا جاء وقت مثلا ( عمل الواجبات) لين الجوال يرن

طبعا هالكلام احتاجه مثل مايحتاجه غيري لاني اكثر وحده تعيش بعشوائيه …والنتيجه يضيع الوقت وانا ماسويت اي شي مفيد

وان شاء الله الكل يستفيد من وقته (^_^)

واللي سبق وجرب نظام غير الجدول وحس انه فاده بتنظيم وقته ياليت يفيدنا كمان

لابتوبي مسكت في راسه ياخذ اجازه

السلام عليكم ورحمه الله وبركاته

بما انه حظي اقشر فلابتوبي الحبيب فجأه قرر انه ياخذ اجازه مني وخرب

 

حاولت فيه يمين يسار بس مرره معند مايبي يصلح فاكتشفت انه لابد اسوي فرمته<<< بالله توك تكتشفين

 

وبما انه بابا مشغول واخوي مايطلع من دوامه الا الساعه 10 وماما تقول مافيني اروح لحي الروضه اللي فيه مركز الصيانه التابع لمكتبة جرير فشكله يالله بعد اسبوع او اكثر راح اصلح لابتوبي

 

عشان كذا ماراح اكون متواجده في المدونه لين لابتوبي العزيز يصلح

 

اشوفكم على خير ان شاء الله

ترى اللي بيخالفني الرأي بزعل منه وهذاني قلت لكم !!

 

بأقول كلام واللي يخالفني فيه فلاعاد يكمل قرايه الموضوع ولاعاد يرد على مواضيعي وانا كمان معادني داخله على مواضيعه

بتقولون متعنته برايها وانها ( ماتنتحاكى) ولااحد يقدر يناقشها بقول (لا وش دعوه ) بس وش اسوي لاشعوريا اتنرفز من اللي يخالفني الراي (ويناشبني برايه

لالا تصدقون تراني منيب كذا

…..بس متقمصه دور الفئات ( اللي ماتتقبل أي رأي يخالف رأيها)

والاغلبيه يمكن سبق واحتكوا بهالفئات لدرجه يمكن تقطعون النقاش مع ( الطرف المتعنت ) من حومة الكبد

وتختمونها بجمله ( انت الصادق والصح) عشان تسكتونه وتندم على الساعه اللي فتحت معهم نقاش

بصراحه عجزت افهم هالفئات ليه ماتتقبل وجهات النظر الثانيه دامها في حدود الاحترام وماقللت من وجهة نظرهم ؟؟

يعني يجونك ناس بمجرد ماتبدا تناقشهم يبدون باللعلعه والصراخ

( هذا طبعنا يالعرب دايما في نقاشاتنا يرتفع الصوت) بزعمه انه اذا رفع صوته بيخليك تقتنع بوجهة نظره ويفحمك ويخليك ماتعرف ترد (بالعربي يحجر لك) مايدري انه الصراخ يسبب اثار جانبيه حيث يصاب الطرف الاخر بالصداع وبطنطه بالاذن وربما (تنفقع) طبلة اذنه ويبحل بعمره

وفيه فئات اذا مااعجبهم كلامك يبدون يدقونك بالحكي ( ويستخدمون اسلوب المزح والا اسلوب غير مباشر) وهو بالاصل دقه فيك (مسوين بريئين ترى مانقصدك) يعني اللي على نياته ماراح يفهم الدقه

وفيه نوع ثالث (هذا خطر تقرب منه) يعني يمكن من العصبيه يفلقك بالصحن اللي جنبه والا يمسك راسك ويخبطه في الجدار (ويخليك تقول البعير يطير من اللخمه) ….نصيحه هالنوع لاتنقاشهم الا اذا كنت بايع عمرك فناقشهم ….واذا مرره مسكت في راسك تبي تناقش هالنوع فأسلم لك ناقشهم بالتلفون ( لان اكثر شي بيجيك تسكيره الخط في وجهك)<<<تسكيره خط ولا انك تتشوه

وكافة هالانواع (يمجرد ماتخالفهم الرأي) يحطونك على طول في البلاك ليست ويقاطعونك ( حتى الدينمارك ماقاطعوهم مثل مايقاطعونك ) ولاعاد يناقشونك او يردون على مواضيعك (تحس فجاه انك ذابح لهم أحد من اهلهم )

طبعا هذولا (يسمعون) بأسلوب الحوار ولايدرون وش هو !! المفروض يعرفون انه مو معنى انه الطرف الآخر عنده وجهة نظر مختلفه انه يعاديهم او يكرههم او مستقعد لهم 

سؤالي:

 

هل سبق وانه صار لكم موقف وانه بمجرد ماخالفتوا وجهة نظر اللي قدامكم قلب عليكم….وايش سويتوا لحظتها؟؟ وبرايكم ايش انسب اسلوب لمواجهة هذي المواقف او الفئات؟؟

حملة جديدة .. من بيشارك ؟؟

هالمره غير .. مو احنا اللي بنقاطع .. 

اسمحولي ادخل على طول بالتدوينه .. لانه بجد شي يقهر .. 

فجأة وانا داخله على احد المواقع او بالاحرى منتدى انجليزي متخصص بالبرمجه الا شوي ويطلع لي اعلان بالانجليزي .. 

طلعلي فيه اول شي علم ايران وبعدها علم السعوديه ♥.. 

عاد انا من اول ماشفت علم السعوديه وعليه علامه X دخلت على طووووول .. 

بعد مااستوعبت الموضوع الا وتطلع حملة مسوينها الغرب الاوسط  :) علي قولهم على الشرق الاوسط .. والسعودية وايران بالتحديد .. 

وشعار الحملة : : “ لا لدعم الارهاب “

كيف طريقتهم لوقف الدعم .. انهم يقاطعون .. 

<<<< نفس طريقتنا ( قلدونا ) بس الظاهر انهم بيلتزمون فيها اكثر منا .. 

بس ايش بيقاطعون ..  ؟؟

بيقاطعون

البترول حقنا .. يعني ماراح يعبون سياراتهم ولا اي شي الا بوقود محلي << ( شوفوا دعم الانتاج المحلي )

شوفوا شعار حملتهم :

( Terror Free Oil )

 

وبعد مسوين لها الحمله موقع ماشاء الله .. بس موقع منظم شوفوه 

هنــا

افتحوه وشوفوا فيه شريط عاليسار .. 

كاتبين :

ندعم الدانمارك

لنعمل حظر للسعودية

نحن نقف مع اسرائيل 

ومن هالعبارات التحفيزيه لهم ( لاحول ولا قوة الا بالله )

وهذي صور من هذه البنرات 

 

 

وبعد مسوين تصويت محترم ..  بيتاكدون من نجاح حملتهم ولا لأ..

شوفوا التصويت

 

العبرة من هالموضوع :

مو انهم بيقاطعونا .. والله ليتهم يقاطعونا الحمد لله جت منهم .. 

ومستحيل انهم يستغنون عن العرب وبترولهم وفلوسهم

بس العبرة .. شوفوا الفرق بينا وبينهم 

احنا الدانمارك سبت رسولنا عليه الصلاة والسلام 

وايش سوينا – الا مارحم ربي – رسائل جوال وايميل وتواقيع 

وبعد كم يوم قالولنا حكومة الدانمارك اعتذرت 

اغلب العرب رجعوا للمنتجات الدانماركيه .. وانا بعيني شفت اللي يشترون منها 

ويوم سألت وحده وقلتلها هذا دانماركي كيف تشتريه ؟؟ << لقافة فيني !!

قالتلي : خلاص هم اعتذروا !! لمتى نقاطعهم ..

وبعدين نشروا الصور المسيئة مره ثانيه وقاطع القليل للاسف 

وين الالتزام فينا وين التنظيم ؟؟

هذول سوولهم شعار موحد .. سووا لهم موقع منظم 

فيه كل شي .. فيه الداعمين – لقاءات مع المسؤولين عن الحمله 

فيه رسائل شكر للشركات الملتزمه معهم – فيه تصويت – فيه اقتراحات 

حتى ان فيه منتجات ( بلايز – تي شيرتات – اكواب-… الخ )  كلها تقدر تشتريها من الموقع علشان تدعمهم 

 

ليش مانقدر نسوي مثلهم ؟؟ احنا سبقناهم علي الفكره وهم تفوقوا علينا 

مع انه احنا نقدر نستغني عنهم .. بس هم لا .. 

 

 

ومن هنا انا وكل من قرأ هذه التدوينة -ان شاء الله – نجدد المقاطعه للدانمارك والغرب وكل من أساء لديننا 

 

هالحمله منقوله من مدونة ابتسم الله يجزاها خير

يؤ وش ذا …وش فيهم البنات اشكالهم كذا !!

السلام عليكم ورحمه الله وبركاته

 

يوم من الأيام كان فيه اسبوع ثقافي القائمين عليه (كلية اللغات والترجمه) وكنت مشتركه في التنظيم

 

طبعا مقسمينا لمجموعات

 

مجموعة المعارض وانا وحده منهم

مجموعة تنظيم المؤتمر

مجموعة المسؤوله عن الضيافه

 

انا مو هنا بصدد التكلم عن هالاسبوع الثقافي ولكن بحكي عن موقف صار لي شخصيا

 

المعرض كان عباره عن ستاندات مختلفه ( جمعية السرطان, اكاديمية الفيصل, اكاديمية الجزيره, ومكتب دعوة الجاليات….الخ)

 

المهم انا ووحده من صحباتي  كنا مسؤولين عن ستاند المشاريع وستاند الخاص بمرضى السكري وكانوا اللي جنبي (مكتب دعوة الجاليات) وكانوا المسؤولين عن الستاند بنات جايين من نفس المكتب (يعني مو بنات قسمي)

 

مره صار بيني وبين وحده من المكتب حوار (راح اجيب لكم الحوار بالمعنى مو حرفيا لاني مااذكره حرفيا )

 

البنت: بصراحه انا من دخلت الجامعه عشان المعرض وانا حاسه بضيقه

أنا: افاا ليه؟؟

البنت : من الاشياء اللي شفتها

أنا : ليه وش شفتي؟؟

البنت: اعوذ بالله كل البنات معاهم جوالات كاميرا وغير الاشياء الثانيه المبالغ فيها

أنا: عادي مافيها شي جوالات الكاميرا وبعدين ايش الاشياء المبالغ فيها

البنت: اسمحي لي مع انك منهم (انا هنا استغربت ايش اللي انا منهم) كملت كلامها: الاشكال مبالغ فيها اقصد الشعر يسوون فيه حركات غريبه وعجيبه غير المكياج والنظارات الشمسيه تحسين الوحده جايه تعرض مو تدرس

( تخيلوا ذاك الوقت كنت بس حاطه كحل داخل العين وقلوس وبلاشر خفيف يعني مكياج صباحي وشعري من خبرت عمري ماقد ربطته طبع فيني احبه مفكوك …طالعه على ماما هع) ويوم طالعت البنت (الا شعرها لاصق وممسوك بكلبسه من ورى ومرفعه اكمام قميصها لحد الكوع حتى ماكلفت عمرها تشيل شعر يدها) هالكلام مو معناها اني احكم على الاشخاص بأشكالهم لاو والله مو هذا طبعي ولاعمره بيكون بس انا اعطيكم الصوره انه كيف تنتقد انه البنات مبالغين في الزينه وهي مبالغه في البهذله

 

قلت لها: بس اختي البنت بطبعها تحب التزين والتصلح وهم ماعرضوا زينتهم على رجال اجانب كل اللي هنا بنات والاسلام ماحرم انه الوحده تتزين بالعكس الله جميل يحب الجمال مو معناها انه جايين ندرس معناها نهمل شكلنا الخارجي بس كمان مو معناها اني اهتم بالشكل الخارجي واهمل الدراسه يعني حلو الواحد يوازن بين الاثنين

 

قالت: مااقدر اصبر لين ينتهي هالاسبوع وان شاء الله معادني طابه الجامعه

 

لهنا وانتهى الحوار ورحت اكمل شغلي

 

بس استعجبت بصراحه انه هالكلام يطلع من وحده جايه من مكان مثل (مكتب دعوة الجاليات) يعني وش له الانتقاد وكانها شايفه ناس مشركين بالله مو متصلحين !! وقسم بالله لو تشوفونها وهي تنتقد تحسين وحده شايفه مصيبه مو بنات متصلحين !! ماانكر ان فيه بنات يبالغون في الميك اب كأنهم رايحين لزواج بس الاغلبيه دايما مكياجهم صباحي…….كنت اتمنى اللي يعملون في هالجهات يكونوا أكثر وعيا وانفتاحا على اشياء مو مخالفه الدين لانهم………………..يدعون الجاليااااااااااات !! J

 

 

متى يصيرون العرب راقين؟؟

السلام عليكم ورحمه الله وبركاته

 

 

من خلال متابعتي الدائمه للمواقع الاخباريه المتنوعه سواء العربيه او السعوديه او حتى الاجنبيه دايما تستوقفني الردود والتعليقات على الاخبار

 

 

طبعا ماراح احكي عن الاجنبيه لانه من متابعتي وربي ماشفت من ردودهم الا التعقل والخلق والتعقيب على الخبر بكل احترام

 

بس عاد لين جينا للصحف العربيه وتحديدا السعوديه شوفوا عاد التعليقات

 

سب

 

شتم

 

كلام مايخرج من طفل صغير فمابالك بواحد كبر الجدار وتلقاه عنده كومة عيال

 

عنصريه مكروهه

 

يعني مثلا يجيك خبر وانذكر فيه اسم شخص من القبيله الفلانيه…يجي البعض (وليس الكل) مايعقب على الخبر ويهمشه وتلقاه طايح لي سب في الرجال وقبيلته وبعدها تشب العصبيه القبيله

 

واحد يقول اقطع واخس لاتتكلم عن هالقبيله اشرف منك ومن قبيلتك

 

والثاني يقول من زين قبيلتك اللي فيها وفيها وفيها

 

والثالث يجي يأيد السب

 

وخذ لك يالذبح والمذابح

 

 

 

 

قبل شوي قريت خبر عن أحد اللاعبين دق على شيخ في برنامج وسأله عن حكم السجود لله شكرا في الملعب وانه فعلهم (يقصد  السجود ) لقى استنكار من البعض ويقولوا الملعب ماانوضع للسجود ورد عليه الشيخ جزاه الله خير وقال له من معنى كلامه انه عادي ومافيها شي

 

في البدايه استغربت وانا اقرا الخبر انه كيف الناس يقولوا الملعب ماانوضع للسجود!! اللي اخبره انه الارض جعلت مسجدا وطهورا ويجونك  ناس مو فاهمين في الدين ويحلل ويحرم على كيف كيفه!!

 

عاد شوفوا التعليقات على خبر الفتوى !!

 

يجيك واحد قال اصلا مايصير ان الواحد يسجد سجود شكر بعد كل هدف وان سجود الشكر ماشرع الا للنعمه المتجدده !! << يعني حتى السجود شكر لله بتقيدونه !!! هالشي بين الله وبين العبد يدخلون ويحطون حواجز ليه؟؟

 

ويجيك الثاني يقول كيف يسجد سجود شكر وهو مو مستقبل قبله وكمان يكون مو على طهاره << مع العلم انه سجود الشكر مايشترط فيه الطهاره او استقبال القبله بس ايش نقول في ناس يفتون بمزاجهم!!

 

 

ويجيك واحد يقول المرونه الزايده في الفتاوي تؤدي لامور خطيره <<ياعم أي مرونه !! يعني تبي الشيخ يقول له لاتسجد شكر لله في الملعب وانه مايسجد الا في اماكن ومناسبات معينه عشان مايكون مرن !! يعني يبون يحرمون شي حلله الله والا ايش بالضبط؟؟

 

طبعا هالتعليقات جزء من اللي اقراه على الاخبار المتنوعه

 

 

الاخلاق البذيئه تطلع

 

الرجل العادي يطلع ويفتي على كيف كيفه ولو الشيخ افتى بغير هواه تلقاه يطب في الشيخ ويخليه مايفتهم في الدين

 

مافيه أي احترام لوجهات النظر والسخريه منها

 

 

يعني لمتى بيكون وضعنا كذا ؟؟ لمتى بنصير مو راقين في اسلوبنا وفي تفكيرنا !! اسمحوا لي ولكن مثل هالناس اصنفهم بالهمج…بس ودهم يهرجون ولايدرون وش يقولون

 

عندكم مثلا برامج التلفزيون الحواريه

 

افتحوا لكم على قناة اجنبيه وشوفوا كيف الحوار هادئ وكل واحد يعطي الثاني فرصه يتكلم بدون مايقلل من قيمة كلام الشخص اللي قدامه

 

وبالمقابل حطوا على قناة عربيه !! شوفوا الصراخ واللعلعه والشتم على اصوله وشوي ويقومون يتجالدون

 

والله اني استحي لين قريت او سمعت هالردود لاني عربيه وهالكلام طالع من عرب والمفروض يكونوا مسلمين بس اشوفهم العكس

 

 

حلمي: ارى الرقي في تفكير العرب يوما ما …فهل ياترى سيتحقق الحلم ؟؟؟